સાંજ વીતે છે જલસા સાથે (રઈશ મનીઆર)

સાંજ વીતે છે જલસા સાથે 

બેઠો છું એકલતા સાથે

સૂર્ય રમે પડછાયા સાથે 

વધઘટ હોય ન કાયા સાથે

મંઝિલથી બસ મનનો નાતો

જીવન વીતે રસ્તા સાથે

બિલકુલ સાથે બિલકુલ નોખા

ચાલ્યા રેલના પાટા સાથે

કાવ્ય લખું તો ઊખડેલો છું 

આમ જીવું તન્મયતા સાથે

ટુકડે ટુકડે મરવું પામ્યાં 

જીવવું’તું સર્જકતા સાથે

મયખાનામાં બેઠો છું તો 

ખેલ કરું છું પ્યાલા સાથે

જગ આખાથી ફરિયાદો છે 

‘શૅર’ કરું જગ આખા સાથે

                      - રઈશ મનીઆર