સ્વ-રચિત કાવ્યપંક્તિઓ

બાળવા મૂક્યાં પત્રો મેં તેમના,

આગમાં પણ ચમક આવી, માનશો? 

*             *                 *               *                *                *

ગોઠવાતો તો નથી હું રૂઢિઓના ચોકઠામાં,

એક બીબું તોય એનામાં મને ઢાળ્યા કરે છે

*             *                 *               *                *                *

લગાલગા સમીપ લાગશે અહીં હવે મને

રચીશ ગઝલ છંદ સહિત હું પછી જુદી જુદી

*             *                 *               *                *                *

ભેગું થયું પીડા તણું દળ મન મહીં 

કાગળ લઈ ચલ આ કરુણ જંગ લખ તું

*             *                 *               *                *                *

જલન ન થાય એવો પ્રણય કોના ભાગ્યમાં હોય છે?

તાપ સહન કરો તો મળે આકાશજળ, ધીરજ ફળે!

*             *                 *               *                *                *

આવી અનાયાસે નયનમાં સ્મરણનું અંજન મુને જ્યારે જરા આંજી જતી
લીલોતરી જેવી સ્મૃતિ અહીં એક કોરા કાગળ પર સહજ સ્વયં તાજી થતી

*             *                 *               *                *                *

લેખ લખતાં લખતાં વિધિ તણાં, કલમની શાહી ખુટી

તો અશ્રુધારા નિયતિ લખવા મદદમાં આવી ચડી

*             *                 *               *                *                *

કોશિશ કરો ઉકેલવાની, ગૂંચ એટલી પડે

જીવતર કોક આંસુ પાયેલો જટિલ દોર છે

*             *                 *               *                *                *

કોશિશ કરી સૂવા ઘણી નીંદર છતાં આવે નહીં

બીમાર મનને સ્વપ્ન કો' કેમે કરી ભાવે નહીં

*             *                 *               *                *                *

તારી ઉદાસી મારી અમાસ, તારી ખુશી મારી  પૂનમ 

મળતાં રહીશું આપણે કારણ-અકારણ જનમો જનમ

*             *                 *               *                *                *

શબ્દોનાં તરાપા પર સવાર થઈ નીકળ્યો છું

પડકારોના અફાટ ઘૂઘવતાં સમંદરમાં!

*             *                 *               *                *                * 

વાતાવરણમાં અચાનક આવતો પલટો

જાણે ખૂબસૂરત સ્ત્રીની નિરંકુશ ઊડતી લટો.

*             *                 *               *                *                *

wi-fiના સિગ્નલ કેટલે?

ઘરનું આંગણું આવ્યું એટલે...

*             *                 *               *                *                *

હતાં મારા જે અખૂટ રસનાં વિષયો,

તેથી જ બન્યો હું નીરસ એની નજરમાં...

(I appeared boring to her due to immense range of interesting subjects I had immersed myself in.)

*             *                 *               *                *                *

ન ખીલવાની જીદ લઈને બેઠી છે એક કળી,

માળીને મૂંઝવણ છે: માવજત કેમ ન ફળી?

*             *                 *               *                *                *

કવિતામાં વજનની સાથે જીવનમાં સ્વજન જેવું પણ હોવું જોઈએ

ઈશ્કિયા શાયરીને સંતુલિત કરવા ભજન જેવું પણ હોવું જોઈએ

*             *                 *               *                *                *

असली चहेरे से लोगों को होती थी बड़ी तकलीफ़

मुखौटा पहनना शुरु किया तो हर जगह सराहा गया !